政情：今日你上鏡：林超英獻計：買件靚衫着30年
天文台前台長林超英一向奉行環保，繼堅持唔開冷氣後，尋日出席一個環保活動時又有新建議。今次佢建議女士們喺買衫時，應該一次過買件好貴嘅衫，因為啲材料剪裁等夠靚，可以着成十年廿年，甚至最靚嘅衫，就算過咗三十年都係咁靚添。咦，咁睇嚟一眾女士們可以攞正牌，買靚衫喇！
林超英仲話，以前中國人會將最靚嘅衫傳好多代，由父傳子、子傳孫咁去保存。雖然冇傳到自己啲靚衫畀個仔，但係佢的確會將一件衫着好多年。佢話好耐以前喺澳洲買咗件冷衫，由當時大仔讀緊小學，着到依家個仔成四十一歲都仲着緊。