政情：鄭松泰扮friend實不和 叫游梁去死

流出錄音 批評大眾白癡

喺立法會選舉期間，熱血公民、普羅政治學苑同埋香港復興會組成「熱普城」聯盟參選。不過，呢排聯盟開始出現分裂，雙方支持者不斷喺唔同嘅網絡平台罵戰，甚至有前熱血公民嘅成員喺網上爆料，批評熱血公民內部嘅運作。

上年十月新一屆立法會開鑼就爆發咗宣誓風波，喺梁頌恆同游蕙禎多次因未宣誓而被拒絕進入立法會會議廳時，鄭松泰曾經一度拎住議事規則，去到主席台前抗議，最後被立法會主席梁君彥認為行為不檢，而被要求離開。

正當大家以為所有非建制派都幫游、梁，繼民主黨（白鴿黨）曾一度話唔認同佢哋嘅言論後，原來鄭松泰都只係同佢哋「扮Friend」。根據前晚網民所流出錄音內容，鄭松泰就話自己要同游梁「扮Friend」，要畀其他人知道熱血公民係幫緊佢哋。鄭仲大鬧，話「因為大眾白癡吖嘛」，所以會以為佢都係本土派、以為熱血公民都係青年新政。

斥黨友違規 洩會議內容

錄音流出後，鄭松泰亦喺自己Facebook發表兩段聲明，證實段錄音係佢喺熱血公民工作組內講嘅，仲話啲內容係同工作匯報、內部溝通有關。同時，佢覺得自己嘅言論係「沒有甚麼是不可對人言的」。另外，佢又批評有啲成員冇遵守黨規，同埋破壞內部溝通指引，對此深表遺憾。佢仲話未來會檢討同改善內部溝通問題。

其實自從宣誓風波過後，游、梁好少喺公眾場合露面，支持度亦大不如前。今次鄭松泰爆粗鬧佢哋嘅錄音流出，明顯係將本土派不和同內訌浮面，而喺呢次風波當中，邊個係人？邊個係鬼？