中環出更：驚大咗唔黐身 王賢訊帶埋仔女去旅行
今時今日嘅小朋友唔單止參加好多興趣班，有啲家長仲會經常帶仔女外遊增廣見聞。其實小朋友咁細個去旅行大個咗記唔記得？仁濟醫院副主席王賢訊同太太朱穎詩就笑言，話記得就假嘅，家長自己都想去就真嘅！仲話小朋友細個時最好玩，對父母嚟講係美好嘅回憶。仁濟主席嚴徐玉珊兒子嚴子杰就剛與太太及囡囡去完峇里返嚟，話囡囡已經學緊游水添喇！
尋日天氣酷熱，仁濟醫院舉行五十金禧嘉年華，卓妮見到王賢訊及太太朱穎詩好醒目，戴帽之餘仲帶埋退熱貼，消暑一流。講起避暑活動，王賢訊話準備嚟緊八月第一次帶仔女旅行去沖繩，認為自駕遊最適合一家大細。講起依家小朋友好細個已經有機會旅行，有三個小朋友嘅佢哋就話大女今年六歲，嚟緊先即將第一次去旅行，又指其實小朋友咁細個未必真係記得，不過佢哋呢個年紀最得意好玩，大個咗可能冇咁黐身o架喇，所以父母趁呢個時間累積多啲回憶係真嘅。
嚴子杰同囡囡去峇里玩水
嚴徐玉珊都認為小朋友咁細個去旅行真係未必記得去咗邊，所以過吓澳門其實都好開心o架喇！而佢個仔嚴子杰係游泳健將，喺外國讀書時更係游泳校隊，識晒四種泳式又參加過唔少比賽，所以嚴子杰話兩歲囡囡都開始學緊游水，呢次去峇里就梗係一齊玩水。
總理鄭李華熙就透露，當年小朋友幾個月大已經常跟佢一齊出國，不過好多時佢哋外遊其實都係半公半私，有時會悶親啲細路，小朋友大大吓覺得悶就開始唔跟佢哋去喇，加上仔女大咗有自己世界，都要同佢哋啲朋友去玩所以少咗機會一齊旅行，不過依家每年佢哋全家旅行都由仔女諗行程，實啱佢哋心水。
卓妮