中環出更：羅致光獲港大頒「老人獎」

距離新政府上任唔夠一個月，盛傳將出任勞工及福利局局長嘅香港大學社會工作及社會行政學系副教授羅致光，尋日獲港大頒發三十五年長期服務獎。呢個時間攞「老人獎」，令佢嘅去向更加呼之欲出。羅致光就話，無論係政策研究定係政策制訂，對佢來講意義都係一樣喎！

羅致光話，任何人喺一個地方工作到咁上下，始終都會有退休嘅一日。咁佢三十幾年教學經驗對將來嘅工作有啲咩幫助？佢唔肯正面回答，強調無論將來做啲乜嘢，即使係政策研究或政策制訂都係一樣。不過話時話，政策研究始終係紙上談兵，但政策制訂就要顧及政治氛圍及財務負擔，兩樣嘢根本唔可以相提並論喎！

羅致光仲話，佢留意到勞工、醫療、房屋及人口等政策都有好多地方可以改進，而近十年來，唔少政策都推展得較慢，所以自己對香港好多政策發展都有好多期盼。回顧今屆政府都留低咗唔少空頭支票，如果佢真係入政府，究竟可以做到幾多就真係要拭目以待喇！

卓妮