病房逼爆，病床放到滿走廊都係，病床與病床之間僅堪一人通過，衞生情況惡劣……唔好以為功夫茶講緊敍利亞戰地醫院，香港嘅公立醫院都係一擔擔，問你怕未！
呢，屯門醫院兒科病房近排就出現上述超負荷情況，有病房佔用率甚至超過百分之三百。據家長反映，病房原本有八張病床，家陣需要額外放多兩張，走廊外更擺放五張病床；醫護人員七個煲要冚十個蓋，一個二個做到踢晒腳；而最得人驚嘅係，今年流感高峰期提前殺到，目前已錄得十五宗兒童流感嚴重個案，話口未完尋日又有死亡個案，病房環境咁擠迫，加上好多小朋友冇戴口罩，萬一交叉感染，後果不堪設想。
講真，屯門醫院服務跟唔上需求，已經唔係一朝一夕嘅事，特別係兒科病房，由於同屬醫管局新界西聯網嘅博愛醫院以及新開嘅天水圍醫院，都不設兒科病房，病人側埋一邊集中晒喺屯院，再加上唔少雙非同單非兒童前來求診，唔爆煲至奇。
想當初醫管局諗住天水圍醫院可以起分流作用，點知家陣掉番轉加重屯院負擔，都咪話唔諷刺。天水圍醫院先天不足，後天失調，既冇兒科服務，又冇住院服務，急症室服務亦只得半桶水，朝八晚四，其餘時間居民就要跨區求診，唔方便事小，分分鐘延誤治療嗰度先至大鑊。
好明顯，公立醫院之所以要挖東牆補西牆，當局規劃失當導致硬件嚴重不足，固然係主要原因，人手配合唔到亦係好大問題。好似天水圍醫院咁，如果要提供住院服務以及二十四小時急症，起碼要加多過千名人手；屯門醫院情況亦唔好得幾多，早排有立法會議員話收到前線員工求助，話兒科病床超負荷情況嚴重，擔心無法應付流感高峰期需求，果然不幸言中。
好嘞，既然醫護人員呻人手不足呻到樹葉落，正路梗係增撥資源請多啲人。事關病人福祉，市民固然舉腳贊成，即使嗰班唯恐天下不亂嘅政客，亦唔夠膽阻頭阻勢，點知最大阻力反而來自前線醫護，之前醫委會改革之所以喺立法會闖關失敗，其中一個主要原因就係醫生擔心引入海外競爭影響晉升機會。最離譜嘅係，醫生一方面擔心飯碗被搶，另一方面爭取改善待遇不甘後人，市民要求加強監管咩，唔係用「專業自主」做擋箭牌，就係誣衊傳媒玩抹黑，呢啲唔係醫醫相護又係咩吖！
一句講晒，公院病床超負荷，引入外援不容拖。家陣醫療事故不絕如縷，市民已經怨聲載道，斷估冇人想內地醫鬧情況喺香港上演啩！