已告別議會嘅民主黨前主席劉慧卿，早前接受爛果報訪問被封為「港獨之母」；講真，佢領導民主黨時，本土派同自決派睇佢哋唔順眼，鬧爆民主黨出賣香港，家陣忽然出來同一班政治小學雞爭咩「港獨之母」，若然，就真係政治墮落！
其後，又見過氣政客接受爛果報訪問，呢趟借回鄉證廢噏，話自八九年六四事件後從未獲准踏足內地，是以多年來一直就北京沒收民主派回鄉證問題，炮轟中央政府云云。雖然北京於去年十一月底決定向民主派發還回鄉證，企圖以此緩和關係，但過氣政客一直未有申請。中央開綠燈，反對派竟然以為買佢怕，大聲夾冇準咁話，「我會唔會去，呢個我要睇吓佢（指新特首林鄭）呢一兩個月發展係點樣，如果林鄭嗰度，真係可以自由去做嘢，我相信我哋去（大陸）係冇乜問題，但如果情況好差，我哋自己就要再諗吓」。
阿姐，你想申請回鄉證，同林鄭施政有冇受中聯辦干預有乜關係？家陣你即使申請，內地亦未必批啊，諗咁多嘢，自說自話，自己開條件，咪咁當自己係嘢至得o架！有乜理由新特首未正式上任「補天」就要聽你支笛？
再講，反對派中嘅小學雞議員如羅冠聰，貴為「尊貴議員」，佢就話佔領行動期間曾與學聯人士上京，但被拒入境，回鄉證被註銷，佢話「內地更為危險」，唔會申請回鄉證。佢又廢噏指中央若想溝通，應以更公開及有誠意的方式，真係三分顏色上大紅。不過，以佢同黃衞兵之流嘅識見，中央即使喺釣魚台國賓館設宴，睇怕佢都唔敢去！反對派中真有識見者恐冇一人，自司徒華一去，集合的都是豬隊友。民主黨主席胡志偉繼拋出「特赦論」後，近日又有「佳作」，佢話「不應將港獨上綱上線成挑戰中共主權問題」。有網民直指胡白癡，一句ＫＯ佢：港獨唔係挑戰中央主權唔通係向中共獻媚呀？