政情：張國柱歐遊 帶兩斤蝦子麵
社會福利界立法會前議員張國柱（阿柱）卸任後少理政事，早排佢就同一班朋友去咗歐洲玩足一個月。咪以為阿柱歐遊實係食好嘢、歎世界，其實佢足足帶咗兩斤蝦子麵自己煮。唔通阿柱想學吓啲後生仔，體驗窮遊嘅滋味？
驚唔慣當地食物
阿柱四月底同朋友去咗法國、德國及瑞士等歐洲國家玩，佢話成個月流流長，怕食唔慣當地食物，就算食得慣都怕食到厭，加上歐洲消費都好貴，所以就自備蝦子麵。佢又話，因為今次係同朋友去，所以可以住民宿旅館，所以自己煮嘢食都好方便喎！
今次歐遊佢哋比較少去大城市，反而喺一啲鄉村小鎮逗留得耐啲。阿柱特別推介法國小鎮Colmar，事關好近雪山，風景非常之靚。阿柱唔去大城市，唔通怕遇上恐襲？佢就話冇呢個諗法，只係大城市已經去過晒，想搵啲新意啫！