政情：UGL專委會接鼎燙手山芋 建制搵人硬食
特首梁振英同UGL專責委員會前副主席周浩鼎「打龍通」，最終搞到周成為炮灰兼退出專委會。立法會內務委員會尋日開會，為專委會補選填補空缺，一如所料，建制派嘅漁農界議員何俊賢打敗泛民嘅梁國雄（長毛），當選專委會委員。至於專委會副主席補選就由建制派議員馬逢國頂上。表面上建制派似乎大獲全勝，但其實唔少建制派當專委會係燙手山芋，分分鐘邊個做就邊個死呀！
其實建制派議員入主專委會，除咗係幫梁振英擋箭，更緊要嘅任務就係阻礙調查，但一個唔小心就會成為眾人嘅炮灰！眼見周浩鼎「出師未捷身先死」，一被外間發現佢涉嫌同梁振英打龍通，即刻萬箭穿心，成為建制派嘅犧牲品，唔少建制中人都驚下一個輪到自己，唔敢接替周嘅空缺。
早前一度傳出，周浩鼎嘅黨友張國鈞可望接力加入專委會，但考慮到專委會可能再發生甩轆事件，或會影響直選議員嘅民望，建制派最後都係決定推舉功能界別、漁農界議員何俊賢接任。
何俊賢馬逢國做爛頭蟀
何俊賢尋日當選後，輕描淡寫咁話係黨內高層邀請佢參選，就算畀第二個做都係臨危受命。不過明眼人都睇得出，建制派係貪漁農界夠「愛國愛港」，即使何之後喺專委會為梁振英護航而失分，對佢日後參選嘅票源都唔會有太大影響，所以先敲定由佢接任。
至於副主席人選方面，早前亦曾傳出由容海恩、何君堯、梁美芬或者黃國健接任，但係佢哋都係直選議員，部分人嘅水平參差、經驗不足，為免再出現差錯，最後都係決定由功能界別嘅老將、文化界議員馬逢國接任。
牌面上，呢次周浩鼎退出專委會所留低嘅委員同副主席都搶得番，建制派本應開香檳慶祝吓，但大家都深明專委會每次開會都係一場硬仗，何俊賢同馬逢國根本只係爛頭蟀，日後仲有排捱。與其開香檳慶祝，不如求神拜佛保佑平安無事好過喇！