中環出更：梁福元梁明堅剪父子裝髮型

十八鄉鄉事委員會主席梁福元嘅髮型幾十年如一日，深入民心，最近佢個仔元朗區議員梁明堅都剪咗一個類似嘅髮型，兩仔爺企埋一齊，真係有啲父子裝嘅感覺。梁明堅話，啲頭髮電起方便打理喎！

梁福元髮型已經變成個人標誌，佢話去大棠有機生態園巡視時，次次都有遊客拉住佢影相，搞到佢好唔得閒，講笑話不如喺生態園放個人形紙牌畀遊客影合照喇！有時佢去外國旅行遇見華人，都會有人叫佢一齊影相喎。

講起生態園，梁福元話依家櫻花、紅葉同埋木瓜樹等各有一萬棵，都係想畀遊客喺唔同季節觀賞到唔同植物，未來仲打算搞孔雀園添！

咪以為梁福元年紀比較大就會好死板，其實佢都好與時並進，平日會叫員工多啲上網睇吓其他生態園係點，學習最新嘅管理方法。

卓妮