古人話，不知史，絕其智；不讀史，無以言。睇吓康文署咪知囉，搞個歷史展覽偏偏自我審查，卒之自暴其醜，釀成公關災難。如果港產官僚肯讀吓歷史，有多啲文化修養，就唔使貽笑大方喇。
係咁嘅，康文署為轄下嘅音樂事務處舉辦四十周年紀念活動，特別搞咗個展覽介紹該處嘅歷史發展，畀市民多啲認識，點知港產官僚引用四十年前《華僑日報》剪報時，係都要多此一舉，將報眉嘅「中華民國六十六年」字眼刪去，只係剩番西曆日期，刻意成咁，梗係被人質疑自我審查喇。
「中華民國」真係咁唔見得人咩？其實只要稍為讀過吓歷史都知，辛亥革命推翻滿清政府，「中華民國」成立，期間一直代表中國，後來國共內戰，國民黨政權慘敗潰逃台灣，直至上世紀七十年代，中華人民共和國取代咗中華民國喺聯合國嘅地位。亦即係話，中華民國係中國歷史長河入面其中一段時間，係歷史嘅一部分，就算內地影視劇亦唔會忌諱呢個事實。就本港而言，好多報紙引用中華民國紀年，直到上世紀八十年代政治形勢改變先至停用，呢啲同樣係香港歷史嘅一部分，唔需要大驚小怪。港產官僚矯枉過正，係都要刪去有關紀錄，以為咁至係政治正確，結果咪弄巧反拙，唔衰攞嚟衰囉。
最好笑係，康文署被人圍插後即刻嚇到跪低，改口話咁做只係考慮版面設計，唔係政治審查喎，但又為未有充分尊重歷史文獻嘅真實性及完整性而致歉，真係乜都係佢講晒。講真，康文署出醜都唔係第一次喇，好似去年一個話劇表演，場刊原本載有劇團成員畢業於國立臺北藝術大學嘅資料，點知康文署係都要刪去「國立」二字，不過其他台灣國立大學嘅資料就冇刪去「國立」字眼，結果引發軒然大波，連台灣當局都越洋表示不滿，你話港產官僚係咪無啦啦整撻瘌吖？
講開又講，家陣最想拆咗「中華民國」呢塊招牌嘅並唔係北大人，而係台獨分子。大家有眼見，蔡英文政府雖然大事做唔成，小事做唔掂，但去蔣化去孫化就不遺餘力，無非就係想抹去台灣同中國嘅淵源，為台獨鋪路。咁你話嘞，康文署好學唔學，走去學台獨分子，唔通想搞港獨咩！
天下本無事，庸官自擾之。港產官僚對歷史一知半解，應做唔做，唔應做偏去做，唔止笑大人個口，仲簡直教壞細路。所以話啫，家陣社會立立亂，部分年輕人唔知中國及香港嘅歷史，仲要唔肯認自己係中國人，港府實在難辭其咎o架！