繼沙田區議員收到「過期」龍舟競渡賽事嘅門票後，又揭發元朗區議會竟然喺端午節過後，先批出派發端午糉嘅撥款申請，認真離奇。歸根究柢，今次審批撥款「過晒秒」，又係泛民同建制惡鬥所造成嘅結果囉！
話說元朗區議會前日、即係端午節翌日舉行特別會議，審議該區就回歸二十周年活動撥款申請。其一名為「糉有你同行」，申請約十六萬元嘅撥款，預計有四日派發端午糉，合共二千隻。
據了解，議程本身安排四月底審議，但當時泛民議員批評建制派議員只接受友好團體申請，而且靜雞雞組成統籌委員會，所以要求發還撥款申請。
泛民嘅舉動明顯係質疑建制派私相授受，建制派當然唔認同，反指籌委會為地區團體自行發起，批評泛民「拉埋嚟講」。不過，建制派最終都讓步，同意發還撥款申請，通知所有團體再公開接受申請，導致區議會要加開特別會議，而該項派糉活動亦係發還後才申請，更要去到端午節翌日先獲得通過，完全「過晒秒」。
雖然獲批撥款，但端午節已經過咗，未知申請機構最終係墊支如期舉行抑或等節後先派糉呢？