政情：泛民倡按量買水 何啟明諷手機限流量

象哥盼政府搞海水化淡

何啟明喺會上指現時東江水統包制度同手機上網流量嘅包月或包年計劃一樣，而有關計算方法肯定會較按量收費為便宜，佢更反問「唔通要後生仔逐K逐K咁計（手機）流量？」佢又話內地唔少地方都會與香港競爭水資源，若取消咗統包制度，並實行按量收費，或會影響本港嘅供水穩定。

另一建制派議員黃定光（象哥）就話相信唔少議員都冇經歷過四日只有四小時供水嘅日子，所以唔會明白昔日制水嘅苦況。但佢認同政府應該增加供水嘅多樣性，希望政府喺海水化淡嘅議題上多加努力。

象哥講制水苦況，泛民就講嘥水。楊岳橋批評本港使用東江水多年，只有一一年差唔多用盡八億立方米嘅配額，但之後都未有用盡配額，直指「亂咁買水都等如倒錢落海」，希望港府思考長遠用水政策。

發展局局長馬紹祥回應時直指若放棄統包制度將影響本港供水穩定，對民生及經濟均會造成極大影響，所以唔贊成有關建議。