政情：徐英偉教波 家長問去向
新一屆政府將喺下月上場，有傳現任民政事務局局長政治助理徐英偉（Caspar）將喺下屆轉往其他政策局出任副局長。Caspar尋日被追問去向時仍三緘其口，只係話自己現有職務將喺本月尾完結，未有透露其去向，但一講到兩個仔，佢隨即眉飛色舞，更透露同囝囝上欖球課時，有家長都關心佢嘅去向。
Caspar最近同兩個仔一齊參與欖球班，希望透過學欖球，讓兒子能強身健體，學習保護自己。佢話欖球班要求家長需要參與其中，做家長教練，因此現時每逢星期日早上都要教欖球。佢透露，初時其他家長都認唔出佢，但近日可能因新班子組班事宜被廣泛報道，終於有家長認出佢，仲問佢日後有乜打算添？
大仔學小提琴 要分頭報名
除咗欖球，Caspar仲透露最近大仔開始學習小提琴。佢話學校近日先開放報名，更笑稱學校嘅報名系統同康文署嘅訂場系統相似，需要經過一輪「鬥快撳」形式爭奪名額，當日系統遲咗十五分鐘都未開放報名，佢同太太最後需要分頭行事，先成功報到名。佢仲透露，由於有唔少人爭奪名額，所以喺開放報名後，唔使五分鐘就額滿，跟住只可以排候補位置。