政情：葉國謙磨爛蓆民記想霸行會兩席
新一屆政府七月一日上任，候任特首林鄭月娥（林鄭）除咗要為新一屆政府籌組班底，作為特首最高嘅智囊嘅行政會議（EXCO）亦需換班。早前已有傳特首選舉期間幫林鄭競選嘅民建聯（民記）立法會議員張國鈞（Horace）會加入新一屆行會，但據聞民記「老鬼」、現任行會成員葉國謙（阿謙）賴死唔走，民記內部亦意見紛紜拆唔掂數，故向林鄭推薦兩人同加入行會。行會非官守議員通常都係建制派一黨一代表，民記今次獅子開大口，想霸兩個位咁大想頭，唔知林鄭又有乜嘢計拆掂佢呢﹖
張國鈞：等候任特首辦公布
特首選舉期間，Horace係林鄭競選辦成員，負責跟進有關選舉法律事宜。早前有報道指Horace將會擔任下屆政府行會成員，阿謙將會被飛走，但近日就有傳唔止Horace出任行會成員，連阿謙都可以留任，變相行會將有兩名民記成員。Horace尋日被問到係咪將加入行會，佢就話：「等候任特首辦公布啦！我冇嘢講。」對於有兩名民記成員喺行會係咪有助同政府加強合作，佢亦都話：「我冇講過。」
Horace加入行會原本民記都支持，除咗因為佢係立法會議員，民記內部亦有意見認為要拉阿謙落嚟，希望可以換新面孔。不過，卸任立法會議員後一度被指「陰魂不散」干預立法會建制派運作、為人詬病嘅阿謙，似乎喺行會亦唔願意退落嚟。
劉業強料接張學明棒
其實現屆政府中民記已經有一點五個成員喺行會，皆因除咗現任嘅阿謙外，仲有身兼新界鄉議局副主席嘅張學明。不過，張學明係代表鄉議局，所以只能夠當「半個」民記成員。隨住張學明已屆退休之齡，有傳佢嘅健康已不如前，所以將會由本身係經民聯嘅鄉議局主席劉業強接替佢，出任下屆行會成員。
經民聯立法會議員林健鋒為現屆政府行會成員，料七一之後都會留任，加埋劉業強，該黨將變相有一點五個行會成員。民記作為建制派最大政黨，故此唔排除呢個都係民記要硬推兩個人入行會嘅原因。話雖如此，民記行會「獨大」必惹非議。佢哋呢個如意算盤打唔打得響，就要睇林鄭點做喇！