中環出更：社服令完「晒」 黃之鋒或白做
香港眾志秘書長黃之鋒聯同主席羅冠聰及學聯前秘書長周永康，喺一四年九月衝擊公民廣場，舊年被裁定非法集結等罪成，其中黃被判八十小時服務令。黃之鋒尋晚喺網上宣布已完成服務令，更以「堂堂正正」去形容自己，對完成判罰甚為自豪。其實，律政司正就佢嘅判刑上訴，如上訴成功，黃之鋒或需入獄，服務令恐怕等如白做。
黃之鋒喺其facebook（fb）上載咗一幅相，相中有一張工作考勤卡，寫有黃之鋒中、英文名字，生效日期係舊年八月十五日，服務時數就填上八十小時。佢喺照片留言，指自己完成八十小時社會服務令，係「堂堂正正承履行法庭判處的刑罰」，又話雖留有案底，但佢不以為恥，指呢個係公民抗命必然需要承擔嘅罪責。
律政司上訴 隨時改判囚
雖然「社會服務令就此告一段落」，但佢仍有官司纏身，正如佢喺fb都話仍要面對律政司正上訴覆核呢次判刑，喺下月要就旺角清場時被控藐視法庭一案上庭。
老實講，若律政司上訴成功，黃之鋒或改判囚，到時等如白做，至於藐視法庭一案，假如罪成，隨時做多次服務令，又豈會係告一段落呢？
卓妮