想當初，鬍鬚曾參選特首係威係勢，仲話冇諗過輸字點寫，結果係點，大家好清楚。唔知係咪物似主人形，佢老哥搞出嚟嘅美食車計劃亦難逃虎頭蛇尾嘅命運，今年春節先開檔，短短幾個月已經要多番救亡，都咪話唔閉翳。
嗱，繼之前某冰室退出美食車計劃後，日前又有第二間食肆宣布拒絕再玩，未出師先褪軚，都係為勢所逼咋。大家有眼見，一早入場嗰班經營者幾乎日日吊鹽水，有啲要兼賣魚蛋燒賣，有啲要做埋工廠區外賣，點知生意都係冇乜起色。家陣惟有玩結盟自救，頭炮係嚟緊嘅國際龍舟賽十四架美食車首度同場晒冷，遲吓諗住拍住上做埋私人派對服務，就算分薄生意都在所不惜，想唔話世界難撈都唔得喇。
美食車死晒火，表面睇係因為地點分散又限制多多，加上價錢唔平，新鮮感過後咪冇人幫襯囉。實際原因係官老爺崇洋媚外，以為美食車喺歐美大行其道，香港一樣掂，但就冇諗過歐美地廣人稀，美食車又唔使交租，售價有吸引力，同香港地小店多兼入場費乸脷不可同日而語。有事實為證o架，目前咁多擺檔地點，生意最好係迪士尼樂園，事關迪士尼入面嘅食物仲貴過美食車，而且遠離市區，冇咁多競爭，弊在其他地點拍烏蠅，賺埋都唔夠蝕。鬍鬚曾無官一身輕就話風流快活啫，難為美食車主為咗止血諗到頭都大埋，官老爺下巴輕輕，結果咪累街坊囉。
正所謂一滴水看世界，港府連美食車咁簡單嘅事都搞到爛尾，其他大事就更加靠唔住。淨係房屋問題呢個「重中之重」咋，官老爺一開始擺出適度有為嘅態度，誓要打低地產霸權咁款，結果事與願違，拓土寸步難行咯喎，惟有一味加辣壓抑需求，點知愈加辣愈升得快，仲衰過舊陣時。最諷刺係港府賣地賣到庫房漏油，今個財政年度首月已錄得盈餘，但無殼蝸牛想上樓就難過登天。官富民窮咯喎，民怨又點會唔愈演愈烈吖。
就算唔講房屋問題呢筆，淨講清算佔中嗰筆，咪又係搞到冇晒聲氣。係人都知，佔中踐踏法治，撕裂社會，將香港搞到雞毛鴨血，點知港府拖足兩年幾，最大金主及幕後黑手到家陣仲係逍遙法外。官老爺有法不依，欺軟怕硬，仲話法律面前人人平等，呃鬼食豆腐咩。
大事做唔成，小事做唔好，就係港府嘅寫照。話時話，美食車出師不利仲可以諗計救亡，之但係房屋問題搞唔掂就會變成政治問題，而佔中唔清算更加會變成管治大問題。港府仲唔拆彈，香港盞永無寧日嘅咋！