政情：智能屋常失靈 林黃寧艷好頭痕
潮流興智能家居，愛沙尼亞共和國駐港名譽領事林建康同太太林黃寧艷（Lianne），早幾年都喺倫敦買咗一間智能家居獨立屋，全家人不時去倫敦小住兼度假。但係Lianne講起間屋就頭痛，事關佢哋一年先去住幾次，間屋嘅智能系統經常因為潮濕而失靈，搞到佢好唔得閒。
Lianne上個月帶奶奶同埋細仔去倫敦，就被間屋嘅智能系統玩到謝晒。話說佢哋夜晚六點幾到埗，點知全屋嘅燈都開唔着，Lianne惟有向控制中心人員求救。佢哋喺電話上「遙控」教工人姐姐同司機整，兩小時後燈終於開得着，但係冇得局部開，一係成層着晒，一係熄晒，真係被玩殘，惟有搵佢哋翌日嚟睇過。
修理一次要萬幾蚊
佢話英國人做嘢好慢，搞咗兩日都唔知佢哋做咗乜嘢，但竟然收到一千多英鎊嘅帳單，即係要萬幾蚊港幣找數，淨係第一晚嗰通電話都要成三千蚊，直言被嚇親。諗諗吓，早知就唔買獨立屋嘞！