政情：鄭松泰預言鄭錦滿再入冊？
有「四眼哥哥」之稱嘅熱血公民副主席鄭錦滿喺佔領行動期間，因違反禁制令，阻撓旺角清場，被判入獄三個月，並已喺日前低調出獄，冇通知傳媒。被問及點解佢低調出獄，同為熱血公民嘅立法會議員鄭松泰解釋，因為四眼哥哥仍有官司在身，七月仲要上庭，「費事出咗嚟萬一又入返去」時惹人非議，故低調處理。唔通佢預言四眼哥哥會再入冊？
被控盜竊罪 七月再上庭
四眼哥哥喺七月需要上庭，主要涉及佢舊年四月喺社交網站上載文章及短片，教人將公共圖書館內的簡體字書籍「消滅」，包括掉到垃圾桶、放進書櫃罅隙及滅火器櫃等，被控以盜竊罪，而佢喺入獄後於四月二十日由囚車押送到法院應訊，並否認相關控罪。
至於出獄後有乜打算？鄭松泰透露，四眼哥哥計劃將會去一趟旅行散散心，之後就參加熱血公民嘅更生人士計劃。呢項計劃畀更生人士報讀各類課程，包括配音、麵包烘焙、西廚、三行、會計等，最快六月初就開始，由於四眼哥哥曾喺澳洲學「整麵包」，故會上烘焙麵包課程「進修」。佔領行動期間唔少參加者被判刑，甚至入獄，唔知呢個計劃會唔會優先考慮因參與佔領而入獄嘅更生人士呢？