政情：CY任期終極倒數 泛民諗計玩殘佢

據聞，民主派會議喺上周曾就答問大會諮詢唔同板塊嘅意見，各大民主派政黨已列出兩個人選，並同立法會主席梁君彥商討，冀梁君彥安排佢哋發問。民主黨（白鴿黨）許智峯話會盡量爭取發問機會，鬥快按掣，而該黨會針對UGL事件提問，佢又話自己會盡量克制，唔會畀個機會CY藉口中斷會議，令議員問唔到嘢。公民黨（公文袋）楊岳橋就話該黨會主要由郭家麒同譚文豪發問，又話問政策問題都無用，因為佢任期只有一個月，所以都會問UGL為主。

答問大會盡量克制免腰斬

至於上次即場播放一段CY當年競選特首時支持全民退休保障錄音，令會議因混亂中斷嘅劉小麗就話會尊重大家共識，即係盡量表現克制，會唔會有大型道具就未知。

而另一個焦點，就係曾經同CY多次隔空駁火，被CY多次質疑係咪適合做調查UGL專責委員會委員嘅會計界議員梁繼昌，可唔可以當面發問，但一切都係等梁君彥安排。梁君彥接受查詢時話希望每個政黨都有發問機會，除咗議員要鬥快按掣亦要按公平方式處理，佢又話答問大會只有一個半鐘，希望順利進行。

另外，由廿八名議員聯合動議提出彈劾CY嘅議案下周三將交上立法會討論，之前有建制派議員建議拉布拉到七月一日，令彈劾動議唔使交上立法會討論，但建議未獲普遍建制派支持而被否決，除非政府突然提交非常有爭議嘅法案，否則彈劾動議無可能拖過七一。無論如何，相信民主派都會用盡機會玩殘任期去到盡頭嘅CY，至於CY係咪會晚節不保，就要睇民主派有幾多功力喇！