中環出更：內地工作日日吔雞 蔡德昇返港唔敢食
夏天又係實習及交流團出動嘅時候，今年打頭炮嘅有香港青聯學生交流網絡「共創系列」暑期實習計劃，講起近年市場渴求熟悉內地職場文化嘅人才，青聯常務副主席郭永亮話好多經歷一定要喺內地實習或工作過先會明，青聯副主席蔡德昇就笑談當年喺內地食足兩個月雞、坐轎上山同擺渡過河嘅經歷，佢仲話返港後有一段時間唔敢食雞添！
喺一眾實習團裏面，青聯舉辦嘅可謂相當吸引，主席吳傑莊透露除咗各頂尖商業機構之外，仲可以去故宮博物院、宋慶齡同志故居及文化部恭王府管理中心等文博機構實習，連學生都大呼體驗難得。
郭永亮就話內地工作文化同香港大不同，笑指內地人熱愛開會，當年佢喺北京讀工商管理，與同學日開十個會，大家關係亦自然變得密切。
何迪夫話最深刻係午睡文化
常務副秘書長何迪夫就話最深刻係內地午睡文化，唔單止廠，內地連辦公室的員工都會午睡。最初佢唔係幾習慣，惟有睇吓新聞同電郵，後來適應咗就發現瞓一覺真係精神好多，工作效率提高，連咖啡都慳番。
蔡德昇以前返內地工作就試過要坐轎上山，真係有兩個大隻佬一人一邊抬住佢成個鐘，水都冇飲過，坦言非常佩服；又試過坐一排竹製成的擺渡過河，文件就咁放地上濕晒；仲曾經兩個月日日食雞，原來當地人話得嗰間餐廳最好，平日肉都冇得食o架！
青聯副主席顏明潤讚內地學生勤力主動英文水平高，顧問容永祺就指內地學生慣到唔同省份工作，冒險精神高。青聯學生交流網絡今年訪問四百五十名大學生，八成表示願意到內地發展，五成願意逗留三年以上，九成受訪者認為內地實習有助裝備自己，望透過實習了解內地職場文化。
卓妮