規管私營骨灰龕營運嘅《私營骨灰安置所條例草案》，立法過程可謂「黑過墨斗」。草案原本上屆就審議，點知因為醫委會改革「拉布」，搞到會期完結都未審到。今屆草案捲土重來，尋日去到立法會三讀階段，啱啱由世衞大會返港嘅食物及衞生局局長高永文，避得過東方航空客機出軌意外，又趕得切喺黑雨返到議事廳，但偏偏遇上建制派不滿泛民彈劾特首梁振英同譴責周浩鼎而發動嘅拉布，喺民建聯黃定光不斷要求記名點票下，草案到完會都未能表決。
