政情:立會急救箱無消毒藥水

一般辦公室都會設有急救箱,以備不時之需,就連立法會綜合大樓都唔例外,除咗喺記者室,議員辦公室樓層都設有急救箱。不過,早前有立法會議員諗住自行處理傷口,就意外發現立法會內嘅急救箱欠缺消毒藥水,認為裝備有所不足喇。

秘書處話會按需要補充

該名立法會議員透露,早前手部擦傷,就打算利用辦公室樓層中,設於茶水間內嘅急救箱。點知成個急救箱淨係得包紮用品,唯獨欠缺消毒藥水,連簡單嘅紅藥水都冇,只好落地下搵保安先解決到問題,仲講笑咁話係咪想人做木乃伊添!

觀察辦公室樓層嘅急救箱,物品擺放得比記者室嘅急救箱整齊,而且物品數量較多。而兩個急救箱入面都有藥水膠布、唔同尺碼嘅紗布、繃帶等,但就不約而同唔見有消毒藥水喇。雖然用清水都可以清洗傷口,但傷者仍然有感染嘅風險,不及消毒藥水咁令人安心,睇嚟立法會內嘅急救箱仍有改善空間喎。

對於被指急救箱裝備不足,立法會秘書處回應話,立法會大樓中,所有工作點,包括員工辦公室、每個議員辦公樓層的茶水間都有急救箱設備,會按需要補充。

第一手消息請下載on.cc東網iPhone/iPad/Android/Windows Phone Apps