政情：任期即將完結CY不務正業
特區政府七月換屆，特首梁振英（CY）嘅任期僅餘個幾月，五年前嗰堆政綱大把嘢仲未落實，依家樓價不斷創新高、取消強積金對沖未有方案，全民退休保障問題仲未解決、廣深港高鐵一地兩檢安排今屆都唔知有冇，一大堆手尾喺度，理論上應該喺限期前再努力啲，睇吓可唔可以趕得切搞掂至啱，點知佢近日不務正業，掛住喺網誌鬧人同種花種菜，今日起三日內飛兩次北京，期間仲要轉換身份添！
轉換身份兼遊飛機河
除咗教育局局長吳克儉喺任期最尾都堅持密密飛外，CY亦密密「離地」。政府新聞處尋日公布，CY喺今日離港前赴北京，以全國政協副主席身份出席政協活動，即日來回，好似遊飛機河咁。
之後又公布CY以特首身份聽日又去北京，出席星期六由全國人大常委會舉辦嘅「紀念香港基本法實施二十周年座談會」，並喺會上發言。三日內去兩次北京，仲要轉換身份添！特首辦回覆指，CY今日申請休假，以全國政協副主席身份出席政協活動，相關開支並非由政府負責，特首辦無資料可以提供。
飛嚟飛去之外，CY連日來化身「鍵盤戰士」，不斷喺網誌狙擊泛民立法會議員梁繼昌，要求梁繼昌辭去立法會調查UGL事件專責委員會成員一職，泛民當然鬧爆佢干預委員會工作，就連建制派議員葉劉淑儀日前都忍唔住批評佢咁高地位，有咁多重要嘅管治工作，但就花咁多時間，日日針對梁繼昌係唔恰當。但佢就當耳邊風，尋日當梁繼昌向立法會申報同佢有民事訴訟後，佢隨即又再次發網誌，再次質疑梁繼昌係咪適合做調查嘅委員。
除咗不停寫網誌，相信CY亦投入咗唔少時間喺佢務農嘅興趣方面，近日將自己親手種嘅朱頂蘭花送畀青協總幹事王䓪鳴，賀對方退休，而政務司司長張建宗最近落區家訪時，特登向婆婆送上CY親手種嘅有機莧菜。
蘭花同莧菜就有收成，但係取消強積金對沖同全民退休保障就仲未有結果。講真嗰句，任期剩番個幾月，就應該好好利用時間落實政綱，唔知CY依家忙緊嘅嘢同發展經濟、改善民生有乜嘢重要關係呢？又唔知喺佢任期完結嗰陣，未完成嘅政綱係咪打算唔提就唔存在呢？