開講有話：前人種樹，後人乘涼；前人種禍，後人遭殃。夕陽政府仲有個零月就收檔，卻留低一個個爛攤子，佔領行動嘅相關檢控工作，拖到依家仲未完成，特別係人稱「漢奸黎」嘅壹傳媒老闆黎智英為首嘅幕後黑手，到依家仲繼續逍遙法外，「法治之區」招牌一鋪打殘，香港人真係多得佢哋唔少。
香港之所以搞成今日咁田地，負責特區檢控工作嘅律政司司長袁國強以及刑事檢控專員楊家雄，絕對難辭其咎。盛傳佢兩位老哥做埋呢屆就唔撈，其中袁國強將會重投私人執業搵真銀，聽講連寫字樓都搵埋。喂，乜佢哋冇聽過冤有頭，債有主嘅咩，旨意繼任者幫手執蘇州屎，仲有冇不負責任啲呀？
大家有眼見，佔領之亂落幕至今就快三年，大部分被定罪嘅只係魚毛蝦仔，至於被「預約拘捕」嘅四十八個頭面人物，拖到最近先至有九件被正式起訴，但又偏偏漏咗被指係佔中幕後黑手兼最大金主嘅漢奸黎；至於漢奸黎捲入嘅政治黑金案，到依家更加係冇晒下文。有法律界人士就講得啱嘞，佔領之亂催生港獨思潮，間接導致旺角暴亂，唔單止搞到香港雞犬不寧，更導致社會對守法界線愈來愈模糊，咁搞法，律政司想唔認失職都唔得喇。
講真，律政司捉小放大，都唔係今時今日嘅事咯。好似陳志雲被指秘撈單畸士咁，明明涉及金額唔大，雞毛蒜皮一件，偏偏死咬多年唔放，最終敗訴兼賠款收場。律政司應告嘅唔告，唔應告嘅亂告，結果撞正大板，畀人揶揄係「亂政司」，簡直自取其辱！
成日話法律面前人人平等，其實香港地早就冇呢支歌仔唱嘞。司法當局一方面檢控佔領搞手大歎慢板，投鼠忌器，另一方面對佔領期間維持秩序嘅七警由檢控、量刑到判刑手起刀落，從快從重；又將向漢奸黎怒擲豬雜嘅民間義士投入大牢。一樣違法兩種處理，仲邊有「公平」可言o架！
不過冇計喇，同人唔同命，同遮唔同柄，漢奸黎唔單止有反對派政客眾丑拱衞，更有外部勢力喺背後撐腰，係人都知港府「懼外症」病入膏肓，畀個甕缸佢做膽都唔敢拉人，普通人唔恨得咁多。再講吖，係人都知袁國強同「佔中三丑」之一嘅戴耀廷係大學同窗，正所謂朝中有人好辦事，會唔會有人因此獲優待，咁就好難話得埋嘞。
古人話齋︰知病之所起，方能治之，香港社會撕裂，亂象叢生，講到尾都係佔中惹的禍。唔理邊個接任律政司司長，當務之急都係撥亂反正，只有將佔領黑手繩之以法，香港先可以重新出發！