政情：六四橫額除名 自決派割席？！

事緣係，有網民發現原先出現喺支聯會六四橫額上嘅朱凱廸、劉小麗同羅冠聰三個名近日被塗黑，仲要唔止一幅橫額，明顯唔係塗鴉，網民就質疑自決派議員印完橫額又要刪名，係要同六四割席。

劉小麗羅冠聰同受累

朱凱廸接受查詢時承認主動要求支聯會除名，事關支聯會出橫額前無問過佢，而佢自己希望就六四事件獨立出橫額，唔想跟大隊，所以要求刪名。佢又強調自己喺六四嘅立場上同民主派無大分別，只係希望大家可以多啲思考，同時六四前後希望可以帶動更多嘅社區討論。

佢又解釋，劉小麗同羅冠聰並無要求刪名，令人誤會自決派同六四割席，佢都話唔好意思。而羅冠聰接受查詢時就話知悉事件，希望支聯會喺可行情況下做番好，但唔得都無所謂，佢強調同民主派喺六四立場上無大分歧，只係行政問題。至於劉小麗亦表明自己其實好支持支聯會六四晚會。

未有問准議員已印製

對於網民質疑，支聯會方面亦迅速回應，話過去都會借民主派議員嘅橫額位，而今屆因為未有問准三人同意就已經印名，於是按朱凱廸要求刪除人名，但又錯刪埋劉小麗同羅冠聰，對於疏忽表示抱歉。

講到尾，自決派對於六四事件仍未有確實立場，所以一個小動作就被惹起割席嘅質疑，若果佢哋可以有個更清晰嘅說法，相信可以減少好多誤會。