中環出更：蘇陳偉香耐心等仔女黐身
早前有調查發現好多後生仔女同家人去旅行容易出現摩擦，亦有抱怨同家人旅行限制多，卓妮尋日喺沙田馬場見到仁濟前主席蘇陳偉香，經常同老公兩個拍拖旅行嘅佢，講起好多年輕人愈大愈唔鍾意同父母一齊旅行，佢就笑言呢個係必經階段之一，細個比較黐父母，大大吓就開始想要私人空間，不過當仔女都做人父母時，依家又開始黐番佢哋喇！
講起後生仔女「仔大仔世界」，覺得同父母去旅行太多掣肘，蘇陳偉香就笑笑口輕鬆回應話通常十零廿歲嘅時候都係咁，不過佢成日同老公公幹順便二人世界都冇乜所謂，反而係有咗孫之後，啲仔女又開始鍾意成日搵佢哋去旅行、飲茶、聚會，早排佢先三代一齊去完泰國旅行，話啲孫好鍾意見到佢，因為佢最「忠」又最「仁慈」，幸福滿瀉。
伍婉婷年年計劃全家旅行
呢日十八區盃賽有唔少議員現身馬場，灣仔區議會主席吳錦津、灣仔區議員伍婉婷同李均頤都在場。伍婉婷話，以前啱啱出嚟工作好少話成家一齊去旅行，反而大個咗先識珍惜同家人相處時間，近年佢同細佬就每年都會計劃全家旅行，佢又指部分行程可以分開玩，咁就唔使悶親大家。佢仲好搞笑咁喺度撒嬌，話呷醋上年細佬飛甩佢同父母三個人去韓國喎，肯定係個甜心寶貝女。
觀塘區議會主席陳振彬就話男仔一般喺十歲後先明事理，但好快趣到十五歲左右就開始唔黐身，而佢兩個仔依家分別十一歲及十三歲，所以要揸緊呢幾年時間同佢哋去多啲旅行咁話。提到後生仔女覺得同父母去旅行有掣肘，佢就話同小朋友去旅行都會就佢哋意願，好似佢哋想去環球影城咁，佢都會一齊玩喎。
卓妮