政情：蔡淑嫻講科技券 辣(興)肥老闆
立法會功能界別議員，當然會覺得自己代表到最多所屬業界嘅聲音，所以對政府簡介政策都特別有要求。立法會工商事務委員會尋日開會，講起資助中小企業的科技券，金融服務界議員張華峯（肥老闆）就相當緊張，要求政府向業界講解科技券事宜，尤其係業界需要提升電腦以配合證監會的要求。不過，官員以為約咗一個協會做簡介會就當係交咗功課，結果惹來肥老闆好不滿。
張華峯批冇人接觸佢
創新及科技署署長蔡淑嫻尋日回應肥老闆話，已獲撥款的機構當中，有證券經紀服務公司已成功申請咗科技券。不過，肥老闆唔收貨，反駁話「金融服務界呢，其實（只）得我去推介畀我哋嘅行業」，批評相關政府部門冇接觸佢。
聽到肥老闆咁講，蔡淑嫻就即刻攞出證據，話已經安排下星期同香港證券協會做科技券簡介會。肥老闆聽到就有啲躁，話該協會只係十個證券協會嘅其中一個，而佢就講緊有成十個團體，再問多次蔡淑嫻可否安排時間與其他團體商討及簡介。蔡淑嫻呢個時候先至連忙重複多次話「可以」，表明會後再聯絡肥老闆喎。