中環出更：西瓜琦上水 下月赴英唱衰香港
被謔稱為「西瓜琦」嘅本土民主前線發言人梁天琦，年初喺港大畢業之後，即刻離開香港遠走到英國讀書，期間一直「潛水」無再發表破格言論。唔知係咪不甘寂寞，佢快將「蒲頭」，喺下個月十一日將現身倫敦大學國王學院（Kings College London）出席研討會演講，講題包括香港政治自由同示威遊行等，好可能想喺當地「唱衰」香港。
將於研討會任講者
本民前尋日喺facebook（fb）貼文，指梁天琦喺六月十一日於倫敦大學國王學院嘅一個研討會中擔任講者，而佢到時將會講到香港嘅政治自由度、示威同支援政治犯遊行等等嘅題目。以佢過往倡議港獨嘅政治立場，再加上參與舊年農曆新年旺角暴亂，以及舊年因港獨立場被取消參與立法會嘅資格等，唔難想像佢到時會乘機「唱衰」香港。
雖然被取消立法會參選資格，但梁天琦成功將「Plan B」青年新政梁頌恆送入立法會，但之後發生嘅辱華宣誓風波，乃至游蕙禎同梁頌恆被取消議席期間，佢就大玩失蹤，被謔稱為「西瓜琦」，直到事後先高調現身，接受傳媒訪問時自認懦弱，因唔想即時還押而選擇咗自己，仲形容自己好廢，好多時候都係得個噏字，又話之後會去進修，似乎選擇咗做政治「逃兵」。之後佢又再銷聲匿迹，個人嘅fb亦鮮有更新。
卓妮