政情:漢奸黎送上門 狂擦特朗普鞋

美國新任總統特朗普出名漠視人權自由法治,又唔尊重女性同歧視新移民,喺國內國外都受到唔少衞道之士批評。偏偏成日將人權自由、法治平等掛在口邊嘅壹傳媒黎智英(漢奸黎),就多次喺旗下報刊大擦特朗普鞋。近日佢更高調到訪多個美國「紅色」州份,同特朗普嘅支持者會面,大讚對方嘅政策,仲肉酸到引用特朗普嘅名句,話美國喺對方領導下「會再次強大起來(It's going to be great again)」。事件除咗印證黎智英的確係個「漢奸」,仲反映佢對美國政府好有所求,但特朗普會唔會睬佢,就係另一回事喇!

漢奸黎尋日透過壹傳媒旗下嘅《蘋果日報》網頁,自爆近日去咗美國訪問,但有別於過往到訪紐約、華盛頓等民主自由之都,今次佢接連去咗多個屬共和黨票倉嘅中南部「紅色州份」,包括堪薩斯、賓夕凡尼亞、俄亥俄、艾奧瓦、路易斯安那同德克薩斯州等,短短十日內去咗十個城市咁多。

肉麻引金句 讚益商家措施

報道仲特別提到,漢奸黎同堪薩斯州州長布朗貝克(Sam Brownback)會面時,形容今次總統選舉結果,反映美國人民求變嘅意願,又大讚特朗普政府提出嘅減稅益商家措施,直言美國「會再次強大起來」,相當肉麻。

其實今次並唔係漢奸黎首次狂擦特朗普鞋,佢之前已多次在旗下報刊撰文,大讚特朗普嘅主張同政策,又力撐美國喺南韓部署薩德導彈,將外界對特朗普嘅種種批評掃入地氈底,明目張膽做漢奸。今次佢仲親自出動,自願「染紅」拜訪埋對方嘅支持者,令人覺得佢對特朗普好有所求,例如想取得美國新政府嘅認許同支持。

特朗普當選 即向中方示好

之不過,喺競選期間揚言會對中國硬起來嘅特朗普,當選上台後冇耐就成個軟晒,包括反口表明唔會將中國列為操控匯率國家,喺國家主席習近平訪美時同對方談笑風生,最近美國仲答應派員出席北京一帶一路峰會,以換取中國加緊向北韓施壓同保障與中國做生意嘅美國企業利益。加上特朗普一早講明唔會再亂花公帑資助啲親美人士同組織,喺國外搞埋啲對美國冇乜好處嘅政治活動,估計無論漢奸黎用咗幾多罐鞋油,特朗普都未必會領情。

第一手消息請下載on.cc東網iPhone/iPad/Android/Windows Phone Apps