茅台唔止係國酒，仲係「腐敗酒」，事關個個貪官難逃「酒色財氣」呢四個字，屋企梗有一批茅台看門口。喺呢方面，港產官僚都可以話盡得箇中三昧咯，否則又點會有「茅台換政協」呢支歌仔唱吖。
係呀，講緊嘅之唔係前廉政專員湯顯明囉。貪湯出名貪威識食，坐鎮廉署期間大手筆購入大批茅台，淨係買酒及酬酢咋，五年使咗近四百萬元，話佢唔係「酒鬼」都唔得喇。好嘞，貪湯雖然逃過法律制裁，但呢批飲剩嘅名酒到底去咗邊呢？嗱嗱嗱，尋日廉署回覆立法會議員質詢，終於真相大白，原來批酒被廉署靜雞雞銷毀，咁都得？
廉署話喎，本來諗過將批酒拍賣，但拍賣前需證明飲品適合飲用，問過食環署及政府化驗所後，程序上一定要先開瓶檢驗，由於開封後會失去市場價值，索性費事煩，銷毀算數喎。
喂，腐敗嘅係貪湯，唔係茅台，老廉使唔使咁大嘥呀！何況批酒係貪湯用嚟同權貴打交道嘅，唔使驗都知必定係頂級貨，否則點可能換到一頂政協嘅帽子戴？再講喇，呢批茅台話晒係公帑購入，點樣處理有冇問過納稅人先？
係人都知，酒係愈久愈醇愈值錢，呢批貪湯珍藏應該公開拍賣，多少彌補庫房損失，點都好過暴殄天物。仲有喎，拍賣可引起轟動，民眾既可以投得心頭好，又可以一窺貪官花天酒地後嘅下場，當係反貪腐國民教育都好吖。所以話啫，「不適合飲用」係假，毀屍滅迹至真，正所謂崩口人忌崩口碗，廉署都係驚留住呢批酒會影衰自家形象啫。
咁又難怪嘅，廉署嘅使命係打貪反腐，偏偏出咗貪湯呢個敗壞門楣嘅廉政專員，真係幾羞家o架。不過咁，一味扮鴕鳥都唔係辦法，咪話功夫茶唔醒條好橋畀廉署歎，一於整個反貪腐博物館，除咗可以展出貪湯嘅茅台，佢前上司曾蔭權爵士收埋啲菜心呀、雞蛋呀、跑步機呀都不妨一併展出，咁先有警世意義吖嘛。有得諗o架，好似位於杭州嘅岳王廟咁，除咗載有岳飛精忠報國嘅事迹，入面仲有秦檜、王氏等奸臣嘅跪像，如果香港反貪腐博物館亦整埋貪官嘅跪像，任人笑罵，大家條氣都順啲，實現和諧社會咪有希望囉。如果宣傳做得好，話唔定會成為香港一大景點添。
話時話，曾爵士搬離禮賓府嗰陣，一樣有一車車運走大批慶祝回歸嘅茅台，有人計過總值成一百八十萬元。批茅台話就話運往前任行政長官辦公室收藏，但早就被人質疑「公酒私飲」，立法會好應該跟進埋呢一筆喇。