政情：任寄養家長 鄧家彪媽媽獲獎
立法會前議員鄧家彪（Bill）早前喺社交網站透露，佢媽媽已經成為寄養家庭姨姨超過五年，仲獲得社會福利署嘉許添！阿Bill更話，媽媽對待寄養小朋友嘅方法，同以往照顧佢時有分別，但佢就話無呷醋。
阿Bill指明白媽媽冇呷醋
究竟有乜嘢分別？阿Bill認為現時同以前嘅生活環境唔同，當年媽媽除咗照顧三個細路，亦要辛勤工作為口奔馳，加上任何母親都只會縱人哋嘅仔女，所以完全明白點解有分別，咁咪唔會呷醋囉！佢希望社會有更多有能力人士去做寄養家長，為有需要小朋友提供家庭溫暖，避免送佢哋入住院舍。
佢仲話同寄養小朋友關係唔錯，過往都有約對方出席家庭活動。而媽媽亦會帶同寄養小朋友，同佢擅長做大戲嘅囡囡一齊上堂，但小朋友上咗一段短時間就發現做大戲唔適合自己。
咁佢會唔會做寄養家長呢？佢自言連畀囡囡嘅時間都欠奉，所以唔符合做寄養家長資格咁話。