政情：沙田區會破紀錄傾到午夜
沙田區議會前日破紀錄，交通及運輸委員會開會時間長達九個半小時，直至晚上十一時五十九分先結束，期間要靠水填肚添！唔通又係拉布？非也，馬拉松會議皆因有多項具爭議項目，而出席嘅議員亦喺會議結束後拍照留念，記錄開會至午夜嘅一刻。
喺前日嘅會議上討論咗違泊問題同埋爭議不斷嘅GoBee.Bike問題，仲要就「在行人通道加建上蓋」及「人人暢道通行」計劃表決，多名議員爭相發言，為其選區爭取福利，令會議時間拖長。
議員會後大合照留念
區議員黃冰芬透露，會上議員爭相發言，即使已到用膳時間仍未見有人離開，大家只係靠飲水填肚。佢形容會議過程非常辛苦，但高興見到會議完成表決。
委員會主席李世榮仲話榮幸見證破紀錄嘅時刻，笑稱前日主持會議時要「搣大髀」提神。佢又透露，前日係首次見到會上無分彼此，因議員係純粹為民生並據理力爭而感動，相信係個好開始。