政情：廉署大嘥鬼貪湯烈酒全銷毀

審計署喺一三年發現廉署社會關係處嘅酬酢開支超出上限，再發現自貪湯○七年上任首年，已購入八十支酒，當中六十六支係餐酒，其餘為茅台同干邑等烈酒。而一○至一一年度又狂買一百二十二支酒，其中廿六支係茅台同干邑等烈酒。

化驗需開瓶 等同報廢

廉政公署早前回覆立法會財委會書面提問時已透露做咗「大嘥鬼」，因為已將貪湯所買嘅烈酒全數銷毁，其他四十支餐酒則繼續用於公務宴請，並且喺一三年全面禁止於公務場合飲用烈酒。不過，議員林卓廷喺上月尾再去信作追問下，令到廉署首次披露做「大嘥鬼」原因。

廉署喺信中再度重申，已將貪湯購入且剩餘嘅烈酒全數銷毀，更解釋銷毀烈酒前曾向政府物流服務署查詢拍賣事宜，但接獲回覆指拍賣前要證明飲品適合人類飲用。廉署於是再向食環署同政府化驗所查詢，所得嘅結論係烈酒必須開瓶檢驗，先能證明適合飲用。

最終基於烈酒數量不多，而且開封後會失去市場價值，廉署就決定做「大嘥鬼」，唔將有價有市嘅烈酒拍賣或捐贈並全數銷毀囉。貪湯因為呢批酒搞到身敗名裂，而且浪費市民血汗錢，更連拎去拍賣填氹機會都冇埋，真係累人又累己。

不過，愛好茅台者唔止貪湯，連前特首曾蔭權爵士都同樣鍾情茅台！曾蔭權喺一二年離任前，就將政府所收嘅賀禮、價值估計約一百八十萬元嘅貴州茅台酒運走，依家仲未知呢批茅台點處理？唔知呢啲珍藏嘅命運會唔會係同樣下場，都係以堆填區作為終點呢？

公務員事務局調查冇聲氣

再講，貪湯捲入連串貪腐醜聞，而廉署做咗場「大龍鳳」花咗三年時間調查，但律政司舊年竟然放生佢，不作刑事檢控，但因事發時貪湯以公務員身份借調廉署，廉署早已轉交公務員事務局跟進，但至今仲未有聲氣，唔知搞乜囉！