中環出更：打機「低呢」怕人笑 容海恩避去網吧
立法會議員容海恩（Eunice）一向都鍾意打機，仲透露以前為咗打機會去網吧「蒲」，但自舊年當選立法會議員後，佢就冇再去網吧打機嘞。莫非進身議會，佢怕去網吧打機會被人認出？佢就話其實係因為已經好少時間打機，一般去網吧打機嘅人都已經打到一定程度，「如果又去好低level（等級）唔係幾好嘅」。原來佢係怕「低呢」畀人笑。
「唔使用腦」遊戲有助減壓
Eunice話過往都係四、五個志同道合嘅朋友相約一齊去網吧，但因為議會工作忙碌，好難約，如果自己一個，倒不如「匿埋」喺屋企打機。佢最近就迷上一個多人對戰嘅遊戲《Clash Royale》，仲話面對議會工作經常要處理各種議題，打機可以幫佢減壓，一啲「唔使用腦」嘅遊戲例如「轉珠」等亦深得佢喜愛。
現時唔少遊戲都要買家「課金」，即出錢買遊戲金幣或寶箱，但佢就從來唔會買，因為唔想跌入不斷付錢購買嘅「無底深潭」。另外，對於政府有意搞電子競技比賽，佢就批評政府至今都「無聲無氣」，宣傳不足，至於會唔會就電競議題與同樣熱愛電競嘅議員羅冠聰合作，佢就話本身有好多朋友有興趣，會同班朋友傾下先。
卓妮