中環出更：工業家感言 扣稅少 礙科研
本港嘅創科發展一直被指落後於其他國家，尤其係喺研究及開發方面。稅務學會會長楊嘉燕（Karmen）尋日出席工業總會（工總）午餐會時提起，依家香港喺研發方面嘅扣稅較鄰近地區少，令企業冇乜動力喺香港研發。至於工總副主席郭振華都認為香港依家嘅扣稅唔夠吸引力，既然下屆政府有意搞研發開支扣多啲稅，就要盡快推出啦！
Karmen話鄰近好多地區最少都有百分之一百五十嘅扣稅，新加坡更有百分之四百嘅扣稅，令到唔少港商都轉去其他地區搞研發，例如醫藥、生物科技就多數會喺內地研發，加上內地較易請人，檢測驗證又容易啲。
鄭文聰教路中小企延續創意
話說今年嘅青年工業家獎及傑出工業家獎開始接受提名，下月底截止。香港青年工業家協會執委沈慧林（William）同工總副主席楊悰傑（Jack）都曾經係青年工業家獎嘅得獎者，原來佢哋仲係中學師兄弟添！佢哋都話工業離唔開科技，Jack就話依家有產品可以放喺狗仔身上，知道健康同情緒等，而本身做開鐘錶嘅William就話行內可以戴虛擬眼鏡選購手錶，佢公司都研究緊呢種形式。另外，佢又講起囝囝原本預計尋日出世，本來擔心同午宴撞期，好彩囝囝早咗出世咋！
由創業者再發展做工業家嘅過程中，工總副主席嚴志明話都食過好多閉門羹，例如約二十年前，曾投標東華三院辦公室重新裝修及購置傢俬項目，佢較競爭對手嘅價錢低一成至一成半，但公司當年只有四個人，最終因冇乜經驗，而未能投得項目，但都覺得係非常好嘅經驗，明白就算承擔到個項目都會好吃力，令自己知道要做足準備，儲下經驗同履歷先。
工總主席鄭文聰就話呢個獎項愈嚟愈多非傳統嘅工業參加，部分行業連佢都未聽過，例如有青年工業家喺一帶一路建馬路，成間廠仲會沿住建路工程一直搬廠添。
佢又提醒由創業後再發展嘅中小企，通常最容易係唔識延續創意，如果創意不能一個接一個，「好多時浪潮完咗，你就會跌落水o架啦！」
卓妮