中環出更：龍子明相處逾40年 無同太太鬧交
香港有唔少職業女性，要兼顧事業同家庭真係唔容易。城市女青年商會舉辦「全港時尚專業女性選舉」開幕啟動禮，評審之一嘅樹仁大學校董龍子明就話，太太同女兒都係職業女性，令佢覺得真係唔容易，社會對女士嘅要求高啲，覺得女性要多照顧屋企，亦令女性困擾較多，而自己同太太識咗四十幾年，未鬧過一次交，佢亦以此身教兩個仔，要點樣尊重女性添！
龍子明同太太係青梅竹馬，拍拖九年半後結婚，雖然有時各自都會鬧吓對方，但從來唔會駁嘴，而太太算半個職業女性，喺佢公司係大秘書，而大女從事酒店業，工作表現唔錯，但都多次諗過辭職湊女，但公司對女兒好好，女兒先會選擇繼續做，兩個咁貼身嘅女士，令佢覺得做職業女性真係唔容易。
伍婉婷抗拒「小花」稱號
灣仔區議員伍婉婷就話香港地嘅職業女性好辛苦，又要識打扮，但係又要避免被人話「得個樣」，例如佢年輕時都會畀人叫做「小花」，自己最初都會好抗拒咁話，「我唔係花呀，我識做嘢o架」，但身邊嘅人都唔明白，明明讚佢靚點解都會有咁嘅反應，佢就轉為反問，「你會唔會叫我隔籬位嗰個男議員做靚草吖」，笑指唔知係咪自己年紀大咗，定係啲人開始意識到，所以依家都冇人叫佢小花嘞！
同場見到民政事務局副局長許曉暉，佢話只會畀女兒睇佢寫有關社企嘅專欄，自小培訓佢哋對社企嘅興趣，仲自爆盡量唔畀女兒睇有關佢嘅報道，講笑話「如果負面報道，可能佢會好激動呢」。佢又講起做職業女性最緊要識平衡，舉例指作為民政嘅官員，加上係女性，母親節有好多活動需要去支持，可能都冇乜時間陪兩個女，女兒亦一早預咗，好彩兩個女都好黐佢，而細女好早就會起身，去佢張床搵佢傾計兼做埋「人肉鬧鐘」，認真甜蜜。
卓妮