「養兒一百歲，長憂九十九。」香港地衣食住行樣樣貴，養育小朋友嘅成本固然重皮，仔女教育問題更令父母頭痛，特別係雙職母親，又要顧家又要搵食，真係少啲精力都唔掂吖，做媽媽真係需要勇氣，好媽媽更加係不易為！
有機構最近就訪問咗三百幾名育有十二歲或以下兒童嘅媽媽，了解佢哋嘅心理壓力情況，結果發現以三十六分為滿分，約三成三受訪者分數高於十四分嘅精神健康警戒線，表示佢哋需要尋求心理輔導，其中有超過五成人表示情緒低落同唔開心，都咪話唔誇張。
有臨床心理學家係咁講嘅，過去幾年求助嘅媽媽多咗近三成，其中超過一半畸士都係因為子女情緒或行為出現問題，而隨着小朋友讀書壓力由中學蔓延到小學甚至幼稚園，母親情緒困擾嘅問題更有年輕化嘅趨勢添。
鬼咩，香港地升學就好似千軍萬馬過獨木橋咁，競爭激烈到冇人有，好多媽媽佗住個B嗰陣時，已經要為寶寶報讀幼稚園而張羅，到真係落手落腳報名，十間八間係等閒事；為咗應付入學面試，好多細蚊仔又學外語，又要學樂器，十八般武藝樣樣要精通，日程表排到密質質，小朋友辛苦時大人亦壓力爆煲，做阿爸嘅都仲好少少，事關陪仔女溫書做作業、去學校見家長等等嘅艱巨任務，十居其九都係落喺母親大人身上，「虎媽」大家就聽得多嘞，幾時聽過有人講「虎爸」o架？
冇錯，升學競爭呢樣嘢並唔係香港獨有，之但係好似香港咁，教育政策五時花六時變，將細路同家長當白老鼠咁舞，又的確係幾少見。唔使講第樣，淨係講嗰個基本能力評估，即前身係TSA嘅BCA試，唔單止加劇咗原本已經嚴重嘅操練文化，更加導致社會撕裂。如果香港教育真係咁成功，班高官就唔使一個二個送晒啲仔女出國留學喇！
講開班廢柴官僚，真係火都嚟埋。香港人唔敢生仔，好大程度都係因為育兒政策唔友善。好似幼兒託管服務咁吖，提供日間託兒服務嘅機構長期僧多粥少，全日制以及長全日制幼稚園嘅比例亦奇低。港府成日叫人生三個，但就口爽荷包立，要政策冇政策，要支援冇支援，頂多就係提高免稅額一類嘅小恩小惠，人哋新加坡嘅配套就完善得多啦，起碼有薪產假都多香港一大截。咁就難怪香港生育率全世界最低，生得佢出仲要養得佢大，教得佢好，責任咁重大，唔係話孭就孭o架。
所以幾時都話，母愛係最偉大嘅，話咁快就嚟到母親節，仔女們識做喇。