政情：3泛民議員12次抽籤冇次中
每次立法會大會，均有兩名立法會議員可以提出無約束力嘅議案，討論議員或者大家關注嘅議題，不過由於合共有六十八名議員，因此要經過抽籤，被抽中者先有得提出議案，距離立法會首個立法年度結束只餘下約兩個月，仍有三名議員齊齊抽足十二次仲未開齋，佢哋分別就係資訊科技界議員莫乃光、民主黨立法會議員尹兆堅及鄺俊宇。
6人同運滯 抽足11次
身為議會新丁嘅鄺俊宇接受查詢時話，自己知悉抽咗十二次都仲未抽中，自然反應係有冇咁邪呀，佢相信遲早都會抽得中，又表明一旦「中籤」，就會提出與動物權益有關嘅議案，又自嘲自己依家嘅情況，同動物權益一樣咁弱小喎。
除咗莫乃光等三人，另有最少六人「同是天涯淪落人」，緊隨其後抽足十一次都係未「中籤」可以提議案，幸好議員任期係四年，相信遲早有開齋嘅一日。