每逢周三立法會大會均有廿二項議員質詢，當中包括議員於會上作出嘅六項口頭質詢，但多名立法會議員都私下大呻，基於議員提出質詢所作預告為七整天，令到佢哋質詢「過晒氣」兼嘥氣，唔緊貼社會最新關注嘅議題及內容，加上議員近年提出緊急質詢鮮有獲得立法會主席「開綠燈」，因此據聞有立法會議員密謀提出修改議事規則，縮短議員提出質詢嘅預告時間。
據知縮短議員提出質詢嘅預告時間嘅初步構思，已經陸續於建制派、泛民陣營之間流傳，其中建制派方面，多個政黨政團代表都表明支持呢個建議，其中民建聯立法會議員張國鈞解釋，依家議員質詢內容滯後得好緊要，舉例指自己早前提出有關被指係改良版TSA嘅BCA問題，依家估計要到本月底先有得提出質詢，形容到時可以提出質詢，隨時一批學生已經參加完BCA計劃。
除此以外，據聞有人對於依家政府官員回應議員口頭質詢時嘅開場白發言，有時長達十多分鐘，變相拉布減少議員追問嘅機會有微言，要求提出限制官員首次發言時間，立法會議事規則委員會委員陳克勤表明對此有保留，強調應交由立法會主席提醒官員發言唔好太冗長，呢個做法較為合適，而且留有彈性。
泛民方面，公民黨黨魁楊岳橋透露，有個別民主派認同縮短議員提出質詢嘅預告時間嘅構思，但目前多方仍未作出正式討論，佢又強調要作出適當平衡，即一旦縮短議員提出質詢嘅預告期，都要預留一定時間畀官員回應。