政情：蔣麗芸教應耀康捉鼠

據悉，阿Ann尋日同應耀康會面兩小時，期間向佢羅列出大量有待房屋署解決嘅問題。阿Ann接受查詢時講到明唔想應耀康因鉛水事件告終而「太得閒」，所以列出問題希望幫佢定下工作次序，督促佢做事咁話，當中首要係捉老鼠。

阿Ann早前喺立法會上提出，訓練流浪貓捕捉老鼠，佢尋日同應耀康會面時亦有繼續詳述呢個建議，並向應耀康提交美國已實行嘅相關資料，希望畀佢考慮呢個建議。佢講起呢個問題時表現得好肉緊，直指美國已有實例去訓練貓隻捕鼠，而香港亦有屋苑為治鼠已飼養貓隻，認為其建議可行。佢更狠批食環署禁止街市養貓嘅做法，認為係變相養老鼠導致鼠患愈見嚴重，直言現時情況離譜，形容政府係「唔畀養貓走去養老鼠」囉！

其後佢又引述《東方日報》報道，直指現時要靠公屋戶自製「籠屋」去避鼠「好核突」，認為政府作為八十萬公屋戶業主，係絕對有責任解決鼠患問題，所以要督促應耀康快啲做嘢。之不過，佢引述應耀康只係話建議新奇同埋會諗諗，最終會否照單全收就係未知之數。

另提議研垃圾徵費執行細節

除咗公屋鼠患問題，阿Ann亦透露會面上仲提及環保同富戶政策等。佢話希望房屋署能夠為幾年後實施嘅垃圾徵費未雨綢繆，盡早研究如何執行，特別係針對年長同有經濟困難嘅公屋戶，既做到符合環保之餘，又唔會擾民。

聽落呢次會面以表達意見為主，阿Ann就話體諒應耀康上任冇耐就遇到鉛水問題，所以依家想房屋署做實事去解決問題，但就表明會更落力跟進公屋鼠患問題。睇嚟應耀康咪使旨意敷衍了事嘞！