中環出更：否認做局長 陳美齡曖昧談做副局
早前有報道指，一向關注教育問題嘅居日香港藝人陳美齡，獲候任特首林鄭月娥邀請出任教育局局長，事後佢一直拒絕正面回應，之後仲返咗日本，引起政界同教育界議論紛紛。陳美齡前晚返回香港，尋日朝早上電台接受訪問，終於較明確咁澄清自己唔會做局長。但問到佢係咪願意出任教育局副局長或顧問等角色，佢又懶神秘咁話：「咁早我諗唔到，係朝早個早，我未食早餐，未飲奶茶。」
稱自己「仲有團火」
陳美齡透露，早前的確曾與林鄭討論香港嘅教育問題，但並非甚麼單獨秘會，而係有大班朋友在場，對方問佢對香港係咪仲好有感情，佢就話「梗係有感情啦！」佢家姐曾經同佢講，只要佢公開否認會做局長，就唔會再出現有關爭論，但亦有朋友教佢，既然係假設性嘅問題就唔應該回應，因而產生種種揣測。
陳美齡形容自己「仲有團火」，批評香港教育制度太過重視考核，認為TSA或BCA應改為抽考及不記名，最好先擱置再檢討，又關注教師待遇不均等問題。對於有人質疑佢缺乏行政管理經驗，陳美齡認為局長嘅職責係服侍而唔係管人，強調如果有啲好重要嘅事同合適嘅崗位，不排除會放棄喺日本嘅生活同工作回歸香港：「如果呢件事大過我自己，每個人都應該去搏命！」
卓妮