中環出更：鄧聲興購物減壓當投資
早前有團體發現港人沉迷購物嘅程度較台灣、意大利同德國等高，唔少人衣櫃入面仲有連吊牌都未剪嘅衫。卓妮尋日喺一個金融服務界嘅活動上見到仁愛堂主席李愛平同香港股票分析師協會主席鄧聲興，佢哋都話好鍾意購物，唔知佢哋又點處理買多咗嘅嘢呢？
經常要出席各大慈善活動嘅李愛平話，平時一定會買多幾套衫擺定喺屋企，出席活動嘅時候着，但佢同好多人一樣都總會買過一啲當時覺得好靚、但返到屋企先覺得唔啱自己嘅衫，有啲着過一、兩次之後又冇乜機會再着，於是愈擺愈多。唔想浪費咁點算？佢話嚟緊仁愛堂會有個二手名牌義賣籌款活動，將一啲靚但又唔適合自己嘅嘢轉賣出去籌款，幫到人又環保咁話。
張德熙影相講究燈光
唔好以為淨係女人先鍾意購物，不時要上鏡同出席公開場合嘅鄧聲興都係貪靚一族，佢話香港地方細冇乜消遣，購物自然變成港人減壓同休閒活動之一。而佢亦最鍾意買衫，尤其係西裝，不過佢就話屋企唔會有未剪牌嘅衫，因為佢通常買之前都會試到啱為止，買咗返去就點都會着喎。佢仲笑言，購物都可以係一個投資，好似佢有儲開相機同錶咁，唔單止保值，有時仲會意外升值添！認真識計數。不過佢話買車同買衫就冇乜呢個可能，所以佢每年都會捐啲衫去救世軍度賣，咁新唔好嘥。
轉頭見到金銀業貿易場理事長張德熙，原來佢對影相都好講究，見佢同事用手機幫佢影相都要用埋手機補光燈，因為佢哋去好多活動場地嘅燈光較暗，依家有咗呢樣神器影相，就一定冇失手喇！
卓妮