開講有話，不作死就不會死，台灣《自由時報》電子報之前誹謗東方報業集團旗下東網台灣，搞到要登道歉啟事，該報懷恨在心又唔敢明刀明槍反擊，轉彎抹角搞埋啲小動作，妄斷東方報道「捕風捉影」，以為側側膊唔多覺，結果惹來港台各界萬炮齊轟，呢啲咪陸雲亭睇相，唔衰攞嚟衰囉。
《自由時報》除咗被同行封為「媒體之恥」、「台灣之恥」，原來仲有另一個花朵，就係「自由亂報」。佢哋生安白造、誣衊栽贓、移花接木瓣瓣齊，只有想不到，沒有做不到。正如有台灣立委形容，《自由時報》抹黑政治對手無所不用其極，與其話係「報紙」，不如話係「傳單」好過。
所以話啫，《自由時報》有口話人冇口話自己，指摘別人「捕風捉影」，根本就係賊喊捉賊。其實「捕風捉影」都算唔錯嘅嘞，好似《自由時報》咁，無中生有老作新聞先至離譜。該報曾經惡人先告狀，控告某名嘴誹謗，事緣對方質疑佢哋民調數字胡編亂造，甚至連民調中心都係子虛烏有，結果唔使問阿貴，梗係敗訴收場喇。
人有人格，報有報格，呢份報紙出名冇品，最鍾意就係撩是鬥非，結果往往引火燒身，自取其辱。該報一再有人因涉及污衊誹謗而被告上法庭甚至被判監，呢啲咪報應囉。佢哋自己都未顧掂自己，仲要踩過界，將隻黑手伸埋過嚟香港，你話係咪不自量力吖。
講過好多次嘞，一份台灣報紙，一份香港報章，彼此辦報風格以至讀者對象都係南轅北轍，各有各做，道不同不相為謀，東方從來不屑與之為伍，可能佢哋唔係廣東人，未聽過「先撩者賤，打死無怨」，如果唔係點會係都要以身犯賤吖。
係人都知，台灣今日族群分裂，藍綠惡鬥，有「台獨地下司令」之稱嘅《自由時報》正正係罪魁禍首之一。該報創辦人林榮三堪稱政治變色蟲，佢喺兩蔣統治台灣時代積極投靠國民黨陣營，大力打壓黨外民主人士；到李登輝同阿扁執政時代，又黐埋去舔着數；旗下報章呢頭反對兩岸三通，反對陸客來台觀光，嗰頭一個屈尾十自己走去大陸炒地皮賺人仔，被批評翻手為雲，覆手為雨，有奶便是娘。該報成日掛喺嘴邊嘅「台灣優先」，原來就係呢挺貨色。話時話，林榮三雖然去世一年多，連葬喺邊都諱莫如深，神神秘秘咁，唔怪得搞到份報紙陰陽怪氣，不倫不類喇。
始終都係嗰句︰犯東方者，雖遠必誅。台獨媒體禍國殃民，多行不義，小鬼作惡撞正捉鬼大師鍾馗，想唔死都幾難！