政情：田北辰另起爐灶 強調唔做一言堂

田二少尋晚喺社交網站facebook（fb）上載多張照片，又貼文指上周五舉辦頌親恩晚宴，指活動有特別意義，事關當晚佢正式宣布新組織嘅名稱，更為名稱解畫。佢指一眾成員喺圓桌內人人平等，不論大事小事亦要坐下討論，甚至「唔啱傾到啱」。

新組織名為「實政圓桌」

換言之，新組織係咪冇「大佬文化」？田二少解釋，係冇一言堂文化。至於佢喺fb寫上只做實事，唔玩政治，係咪真係唔玩政治呢？佢話由於以往話唔玩政治，畀人鬧話呃人，所以新組織「實政圓桌」中嘅「實政」，係強調做實事嘅初心，代表從事務實嘅政治工作，亦希望透過圓桌嘅討論提升政治水平。

佢又話喺圓桌會議中亦會討論佢喺立法會嘅事務，對於某啲問題若冇一致意見，少數必須服從多數，如若出現意見各佔一半嘅情況，佢就擔當仲裁員的角色，最後扑槌。