中環出更：王國強為陪愛孫 經常飲茶
酒樓係陪伴港人成長嘅地方，但隨住時代轉變，點心車買少見少，「登鄧凳登，陳先生請聽一號線」更成為絕響。尋日卓妮喺沙田馬場見到廣東社團總會榮譽主席王國強（KK），佢話自己本身唔好飲茶，但有三個仔女三個孫嘅佢，為咗陪孫反而會去飲喎！
近年唔少舊式酒家結業或轉型，以往酒樓中央嘅經典龍鳳雕刻早已不再，改以婚宴場地或新式點心做賣點。KK話以前都會陪父母飲茶，但自己唔係特別鍾意，後來都好少去，但有咗孫就唔同講法喇！不時會同兒子王紹基及佢太太Josephine，仲有幾個孫一齊去飲，人數多坐圓枱傾偈食嘢最方便。王紹基同Josephine就笑言，有咗小朋友之後，小朋友食乜嘢點心佢哋就要食乜嘢，不外乎都係叉燒包，夠晒老少咸宜。
韋國洪童年時只可叫一款點心
沙田區議會前主席韋國洪亦鍾意飲茶，仲話經歷過三個飲茶階段，最初係細個跟父母食「一盅一件」，因為家境一般，飲茶又貴，只可以叫一個點心，想食多隻糯米雞都唔得；到後來大個咗，禮拜日想休息，但阿爸就七點鐘拍門叫醒佢飲茶，梗係唔多想去啦；反而依家就輪到佢自己鍾意朝朝飲茶喇！佢話好多懷舊點心好似臘腸卷、糯米卷咁都唔見晒，又指飲茶習慣自己洗杯，仲要用茶洗，順便洗埋第一浸茶葉咁話。
好耐冇現身馬場嘅信和集團主席黃志祥就話，細個同父母喺新加坡唔興飲茶，早餐通常都係食咖椰多配杯咖啡，雖然中式點心唔係佢杯茶，但佢喺香港都試過趁熱鬧飲吓，仲好驚嘆啲侍應沖茶同收派碗碟嘅身手敏捷，講到眉飛色舞，讚嘆絕對係香港特色咁話。
卓妮