呢排武術界最熱門嘅話題，莫過於有「中國格鬥狂人」之稱嘅徐曉冬秒殺所謂嘅太極大師魏雷。呢個故事教訓大家，嘢可以亂食，禍唔可以亂惹，交更加唔可以亂打，特別係雙方實力唔喺同一檔次，盞自取其辱嘅咋。
話說《東方日報》日前有篇報道，提到內地商人郭文貴喺中共十九大前夕連番爆料，背後有保護傘策劃，而中共最高層已決定將之打掉。之後台灣《自由時報》網站亦轉載呢篇文章，但就陰陽怪氣，含沙射影，將本報標籤為「親中」媒體不特止，呢頭話北京動員境內外媒體攻擊郭文貴，嗰頭又話本報報道「捕風捉影」，神又係佢鬼又係佢。
咁就好笑嘞，如果東方真係聽北京支笛嘅「親中」媒體，報道內容自然堅過石堅；掉番轉講，如果報道只不過係「捕風捉影」，又點會係受北京「動員」呢？再講吖，一邊係台灣媒體，一邊係香港媒體，大陸新聞各有各做，本報報道出街後冇人出面否認之餘，仲引起廣泛反響，《自由時報》算老幾，幾時輪到佢哋說三道四！
當然喇，世上沒有無緣無故嘅恨，《自由時報》對東方嘅滋擾同抹黑其實一直未停過，東方早前忍無可忍狀告《自由時報》誹謗並獲勝訴，該報最終要喺網站首頁刊登道歉啟事並支付部分訟費，慌唔係老羞成怒挾私怨報復咩。
係人都知，《自由時報》幾十年如一日鼓吹台獨，抹黑中國不遺餘力；反觀《東方日報》一直弘揚正氣，堅持企穩民族立場，《自由時報》視之為眼中釘，肉中刺，甚至氣急敗壞，胡攀亂咬，一啲都唔出奇。不過咁，兩岸遲早統一，作為台獨旗手嘅《自由時報》有咩下場，不言而喻。大家可以睇到，該報創辦人、有「台獨地下司令」之稱嘅林榮三過身後，其下葬時間同地點一直諱莫如深，至於係咪怕重蹈汪精衞身後被炸墳嘅覆轍，只有佢哋自己心知肚明。
講開又講，唔知係咪物以類聚，人以群分，《自由時報》同「爛果報」，一個反中亂台，一個反中亂港，估唔到連無中生有、老作新聞呢家嘢都係難兄難弟，特別係前者，剽竊其他報紙新聞更加係家常便飯，以致被同行狠批「媒體之恥」、「台灣之恥」，佢哋批評人「捕風捉影」，同賊喊捉賊根本冇分別。
正如國家領導人話齋，我哋不信邪不怕邪，不惹事不怕事。既然《自由時報》咁鍾意生安白造，撩是鬥非，唔使再搞埋晒啲小動作，大可明刀明槍放馬過來，文鬥又好，武鬥又好，我哋一定奉陪！反正東方咁多年嚟掃盡大大小小魑魅魍魎，唔爭在收拾多一件半件！