好多人都會擺喺屋企用嚟招財嘅貔貅，據說係一種專食財物，而且有入無出嘅生物。咪以為只係神話吖，對於香港迪士尼公司嚟講，同樣有入無出，旱澇保收，穩賺不賠，同貔貅冇乜分別嘅咋。
喺建制派護航兼夾港府出動狗仔隊全力箍票底下，立法會財委會尋日終於通過向迪士尼注資五十四點五億港元，支持樂園擴建工程嘅一半費用。主其事嘅商務及經濟發展局局長蘇錦樑鬆毛鬆翼，話相信立法會討論撥款嘅過程，已經給予迪士尼公司好大壓力喎。
真係唔講猶自可，一講把幾火。之前迪士尼公司至話「一係接受，一係拉倒」，強調現時已經係最佳方案，一副食硬你嘅架勢，壓力就真係唔多覺嘞，反而好似有立法會議員形容咁，港府畀人當提款機咁任撳唔嬲就真。鬼咩，港府洗濕咗個頭，幾唔情願都要焗住輸血，最弊係不知何時了局，之後使唔使再用公帑填氹，真係冇人話得埋。
冇計啦，當年香港受亞洲金融風暴同沙士夾擊，港府諗住興建樂園沖喜，有求於對方咯喎，結果就簽訂咗城下之盟，迪士尼公司出豉油，身為大股東嘅港府出雞，最慘係無論賺蝕，迪士尼公司都可以收取高額管理費同專營權費，咁多年嚟港府一毫子都冇進帳。唔怪得對於今次撥款，市民（興）過辣雞，連部分建制派議員都忍唔住反枱喇。
冇錯，港府一味輸血的確唔係長遠之計，但亦冇可能話關閉就關閉，由得之前投資倒落鹹水海就算。五十幾億既係已出之物，不如諗吓點樣用喺刀刃上。東京迪士尼樂園啱啱宣布斥資五十億港元進行大擴建，加上面對上海迪士尼競爭，香港嘅新增設施點樣可以增加吸引力？唔該港府唔好扲完錢就關人個關，完全假手迪士尼公司。
話時話，港產官僚最鍾意講同國際接軌，環顧全球咁多間迪士尼樂園，好似港府咁硬食「不平等條約」嘅，真係搵唔到第二間，同樣錄得虧損，巴黎迪士尼就曾獲免收管理同專營權費，唔通香港人好恰啲？點解港府唔諗吓同迪士尼公司再傾過條數？講真，香港最值錢嘅就係土地，嗰度講緊成幾十公頃地，又有齊交通配套，如果當初用嚟起樓，已經可以幫到唔少無殼蝸牛喇！
當然，話又要講番轉頭，一個地方要同人爭遊客生意，冇可能淨係靠一個半個主題樂園食胡。香港景點十年如一日嘅問題備受詬病，官老爺繼續抱住「成就並非膚淺，無懼競爭」嘅心態，一味坐吃老本，香港遲早都係瓜得！