本屆政府仲有唔夠兩個月就玩完，政策上話就話「成熟一項推出一項」，但係市民有目共睹，冇靈魂冇神經政府係「推出一項跪低一項」，尤其「重中之重」嘅樓市政策，政府一味「加辣」，樓價卻愈飆愈高，基層置業難過登月球探火星，年輕人想搵地方「成家立室」就如鼻尖上放糖——看到吃不到。老朽相信女媧煉五色石補蒼天易，政府覓地建公屋難；基層住劏房等上樓，等到頸抽筋都仲係得個「等」，成卅萬人在公屋輪候冊上。三年上樓？想創你個心吖！
其他「民生無小事」嘅又有幾多值得你欣賞？搞「美食車」堅離地，彈多過讚；搞環保一味徵費；搞醫療唔係添人手而係狂加急症室收費；疏導交通又研究大加「牛肉乾」罰款而不是研究增建多些停車場……最近本報踢爆環保署「懵盛盛」用「大嘥鬼」fb推廣食環署巡查不力嘅「無牌食肆」，民間監察團體批評事件暴露環保署宣傳惜食食肆前，未有向食環署查證，食環署又巡查不足，兩署做事堅離地把關不力。食店未有牌，即係毋須巡查，試問食客如何會有安全保障；冇牌即係毋須受規管，而環保署仲要大力推介，不荒謬嗎？
一個社會嘅民生，病變成一溝死水，很大程度上緣於官員懶理，各自為政，一有溝通，又事不關己，「禮讓」推莊，像一四年審計署報告，便揭露政府部門互相卸責樹木管理，樹木辦話康文署要負責病樹管理，康文署就話要有花槽或樹槽才算，大家玩太極推手，政府部門真係幾hea都有！
所以話，唔單止樹木會病變，一個社會管理無能，一樣會病變！變得全無活力，變得無力自救，難以給自己做甚麼手術，反正好官我自為之，這種死水，若然大家要求不高，一樣會有啲風景你睇，就係養活規模龐大的蒼蠅和蚊子。改變世界並非有智慧有魄力嘅人才做到，呆鳥和笨蛋也能，只是他們把世界變得更糟而已。