中環出更：長毛被指言論粗俗 逐出會議
立法會財務委員會尋日審議港府加入亞洲基礎設施投資銀行嘅股本，涉及六十億元，期間多名議員嘅言論火花四濺，首先有負責主持會議嘅財委會主席陳健波（波哥）疑似爆粗，稱「X你再講嘢，我要停止你發言」，而社民連梁國雄（長毛）隨後涉以冒犯性語言「dickhead」形容官員，二人事後都要解畫「補鑊」。
事緣有議員發現政府申請亞投行嘅文件出錯要求撤回，波哥稱此舉只屬手民之誤拒絕撤回建議，長毛發言時批評波哥裁決不公，形容議員係「egghead」，即迂腐嘅知識分子，被官員「dickhead」欺負，隨即被建制派議員質疑有關言論粗俗，波哥接着要求長毛收回言論，並趕出會議室，雙方擾攘一段時間後，波哥最後決定提早結束會議。
陳健波也疑爆粗
另一方面，有人發現波哥較早時間嘅發言疑似爆粗，波哥於立法會議員鄭松泰發言後突然稱，「X你再講嘢，我要停止你發言」。波哥事後稱當時只係講「如果」，而唔係粗口，又解釋當時好明顯係甩嘴或者係講歪咗，隨後更為自己有咁嘅發音道歉，承諾日後會「講番正啲」，重申唔會厚顏無恥唔承認自己說咗粗口。
梁國雄會後則死撐「dickhead」嘅意思係不可理喻、傻瓜等，辯稱其言論冇冒犯性，又稱「dickhead」同「egghead」係相對。佢又批評，陳健波為政府護航嘅程度已經到咗歇斯底里狀態，呼籲對方如有病應該去睇心理醫生。
卓妮