中環出更：與寶蓮寺有緣鄭淇德助解難題
醫療專業人士協會榮譽秘書長鄭淇德，日前接受寶蓮寺嘅邀請出任顧問。之不過，佢唔係佛教徒，點解肯做顧問呢？皆因同寶蓮寺好有緣分囉！
鄭淇德話初次接觸寶蓮寺係四十幾年前，當時佢嘅媽媽已經係一位居士並喺寶蓮寺唸經。有日身為中學生嘅鄭淇德參加梅窩一個爬山比賽，之後就上寶蓮寺探母兼喺寺內過夜，翌晨仲同其他寺內借宿嘅登山客一齊攀上鳳凰山觀日出。
多年後，佢處理亡母嘅身後事，釋智慧和尚親赴喪禮主持法事儀式，令佢感激不已。佢話唔好以為出家人遠離俗世，就毋須面對凡塵事務，譬如慈善服務嘅方向，或者醫療同法律等問題，箇中嘅複雜程度未必係出家人所能掌握，於是就要搵俗世人幫手。
其實，鄭淇德之前已經代表寶蓮寺參與內地嘅慈善服務，今次應邀做顧問，只係為佢嘅義務工作添上名銜，同獲邀做顧問嘅仲有鄧清河、吳金龍同雷賢達。當日香港佛教聯合會會長釋智慧同食物及衞生局副局長陳肇始都有嚟撐場。
麥美娟浴佛 唔怕信仰衝突
本身係基督徒嘅立法會議員麥美娟（Alice）尋日同工聯會理事長吳秋北應西方寺邀請，一齊參加浴佛典禮。佢哋喺一個載有七色花嘅水盤中，舀水出嚟淋到佛像身上完成儀式。
Alice話今次係第二次參與浴佛儀式，唔擔心參與佛教活動會同信仰有衝突，認為活動係一種文化體驗，亦非常尊重有關儀式。佢更喺活動上重遇大學時期嘅師兄，諗起那些年同師兄一齊擔任校友會活動司儀，更大讚對方風采依然添！
卓妮